తెలంగాణ మంత్రి హరీష్ రావు ఆంధ్రప్రదేశ్ ప్రభుత్వం మీద చేసిన వ్యాఖ్యలకు అధికార వైసీపీ మంత్రుల నుండి గట్టిగానే సమాధానం వస్తుంది. ఏపీ ప్రభుత్వం అక్కడి ఉద్యోగులు, ఉపాధ్యాయుల పట్ల కర్కశంగా వ్యవహరిస్తోందన్న కామెంట్స్ హీట్ పెంచాయి. హరీష్‌కు ఏపీ మంత్రులు కూడా కౌంటర్ ఇస్తున్నారు. టీచర్లకు తాము ఏమి చేశామో ఏపీకి వచ్చి చూడాలన్నారు మంత్రి గుడివాడ అమర్నాథ్. హరీష్‌రావుకు సీఎం కేసీఆర్‌‌కు గొడవలు ఉంటే వాళ్ళు వాళ్ళు చూసుకోవాలని ఆంధ్రప్రదేశ్‌పై ఎందుకు పడుతున్నారంటూ హీట్ కామెంట్స్ చేశారు.
ఏపీ ప్రభుత్వం అక్కడి ఉద్యోగులు, టీచర్ల విషయంలో కర్కశంగా వ్యవహరిస్తోందని హరీష్ రావు వ్యాఖ్యలు చేశారు. వారిపై కేసులు నమోదు చేసి లోపలికి పంపిస్తోందని కానీ కేసీఆర్ ప్రభుత్వం మాత్రం ఉపాధ్యాయులతో స్నేహపూర్వకంగా ఉంటుందని చెప్పుకొచ్చారు. ఐదేళ్లలో 73 శాతం ఫిట్‌మెంట్‌ ఇచ్చిన ఏకైక రాష్ట్రం తెలంగాణ మాత్రమే అన్నారు. ఉపాధ్యాయులకు కొన్ని సమస్యలు ఉన్నాయని, సాధ్యమైనంత వరకు సమస్యలు పరిష్కరిస్తామన్నారు. ఈ వ్యాఖ్యలపై ఏపీ మంత్రులు మండిపడుతున్నారు హరీష్‌కు కౌంటర్ ఇస్తున్నారు.
సీఎంగా ఉన్న కేసీఆర్ ఎనిమిదేళ్లుగా తెలంగాణకు ఏం చేశారో చెప్పాలన్నారు అమర్. కేసీఆర్‌ను హరీష్‌రావును చూసి తాము నేర్చుకోవాలిసిన అవసరం లేదని ఏపీలో మూడేళ్లలో తాము ఏం చేశామో ప్రజలకు తెలుసు అన్నారు. హరీష్‌రావు,కేసీఆర్ మనిషా? రామోజీ మనిషా అంటూ ప్రశ్నించారు. కేసీఆర్‌ను ఏపీ మంత్రులు తిడితే హరీష్ సంతోషించాలని అనుకుంటున్నారని ఆ అవసరం తమకు లేదన్నారు. తమను తిడితే హరీష్‌కు మార్కులు పడతాయా అన్నారు. ఏపీ భవన్‌లో హరీష్‌రావు అధికారిని కాలితో తన్నిన ఘటన జనం మర్చిపోలేదన్నారు. అధికారులతో హరీశ్‌రావు ఏ విధంగా వ్యవహరిస్తారో అందరికీ తెలిసిన విషయమేనన్నారు. అలాంటి వ్యక్తితో నీతులు చెప్పించుకోవలసిన అవసరం తమకు లేదని ఘాటు వ్యాఖ్యలు చేశారు.
