జగన్నాధుని ఆశీస్సులతో రాష్ట్ర ప్రజలు ఆయురారోగ్యాలు, సుఖశాంతులతో సుభిక్షంగా ఉండాలని ఆంధ్రప్రదేశ్ గవర్నర్ మాననీయ బిశ్వభూషణ్ హరిచందన్ అన్నారు. మానవ ప్రయత్నానికి అండగా దైవ సంకల్పం తోడైతే అంతా శుభమే జరగుతుందన్నారు. ఇస్కాన్ దేవాలయం ఆధ్వర్యంలో నిర్వహిస్తున్న జగన్నాధ స్వామి రధయాత్రను గవర్నర్ విజయవాడ వజ్ర గ్రౌండ్స్ నుంచి ప్రారంభించారు. రధ పూజతో గవర్నర్ జగన్నాధ రధయాత్రను తొలిసారి ఆంధ్రప్రదేశ్ ప్రజలకు పరిచయం చేసారు. గవర్నర్ మాట్లాడుతూ అధ్యాత్మికత ప్రజల మధ్య శాంతి సామరస్యాలను హేతువుగా నిలుస్తుందన్నారు. పూరి జగన్నాధ రధయాత్ర ప్రపంచ ప్రసిద్ది నొందిన రధయాత్రగా గుర్తింపు పొందిందన్నారు. ప్రపంచంలోనే రెండో అతిపెద్ద భక్తి సమూహంగా పూరి రధయాత్ర నిలించిందన్నారు. ఇస్కాన్ దేవాలయ ప్రతినిధులు మంచి కార్యక్రమాన్ని ఎంచుకున్నారని, ఈ రోజు 80పైగా దేశాలలో సుమారు 400ల వరకు రధయాత్రలను ఇస్కాన్ నేతృత్వంలో భక్తజనావళి ఆధ్వర్యంలో జరుగుతుండటం మంచి పరిణామమన్నారు. విజయవాడలో తొలిసారి రధయాత్రను చేపడుతున్నప్పటికీ జగన్నాధుని ఆశీస్సులతో ఇది భవిష్యత్తులో అతి పెద్ద రథయాత్రగా రూపుదిద్దుకుంటుందన్న ఆశాభావాన్ని గవర్నర్ వ్యక్తం చేసారు.
