కామన్వెల్త్ గేమ్స్లో భారత్ వెయిట్ లిఫ్టర్లు సత్తా చాటుతున్నారు. మిజోరాంకు చెందిన యువ వెయిట్ లిఫ్టర్ జెరేమీ లాల్రినుంగా 67 కిలోల విభాగంలో స్వర్ణం సాధించాడు. స్నాచ్ ఈవెంట్లో 140 కిలోల బరువెత్తిన జెరేమీ కామన్వెల్త్ క్రీడల్లో రికార్డ్ క్రియేట్ చేశాడు. క్లీన్ అండ్ జెర్క్ విభాగంలో అతడు 160 కిలోల బరువులెత్తాడు. మొత్తంగా అతడు 300 కిలోల బరువులెత్తడం విశేషం. ఇది కూడా కామన్వెల్త్ రికార్డే. జెరేమీకి ఇవే తొలి కామన్వెల్త్ క్రీడలు కావడం గమనార్హం. కామన్వెల్త్ క్రీడల్లో స్వర్ణం సాధించిన జెరేమీని ప్రధాని మోదీ అభినందించారు. మన యువశక్తి చరిత్ర సృష్టిస్తోందని మోదీ ట్వీట్ చేశారు. తొలిసారి కామన్వెల్త్ క్రీడల్లో పాల్గొన్న జెరెమీ స్వర్ణం సాధించడతంతో పాటు కామన్వెల్త్ గేమ్స్ రికార్డ్ సైతం సాధించాడని ప్రధాని కొనియాడారు. చిన్న వయసులోనే దేశానికి పేరు ప్రతిష్టలు తీసుకొచ్చాడన్నారు.
Our Yuva Shakti is creating history! Congratulations to @raltejeremy, who has won a Gold in his very first CWG and has set a phenomenal CWG record as well. At a young age he’s brought immense pride and glory. Best wishes to him for his future endeavours. pic.twitter.com/dUGyItRLCJ
— Narendra Modi (@narendramodi) July 31, 2022
ఈ కామన్వెల్త్ క్రీడల్లో వెయిట్ లిఫ్టింగ్ విభాగంలో భారత్కు ఇది రెండో పసిడి పతకం కాగా, ఇదే విభాగంలో భారత్ ఇప్పటి వరకూ ఐదు పతకాలు గెలుపొందడం విశేషం. మీరాబాయి చాను స్వర్ణ పతకాన్ని సాధించిన సంగతి తెలిసిందే. సాంకేత్ సర్గార్ (రజతం), బిద్యారాణి దేవి (రజతం), గురురాజ్ పూజారి (కాంస్యం) సైతం వెయిట్లిఫ్టింగ్ విభాగంలో పతకాలను గెలుపొందారు. మిజోరాంలోని ఐజ్వాల్కు చెందిన 19 ఏళ్ల జెరేమీ 2018లో జరిగిన యూత్ ఒలింపిక్స్లో 62 కిలోల విభాగంలో బంగారు పతకం సాధించాడు. గత ఏడాది జరిగిన కామన్వెల్త్ ఛాంపియన్షిప్స్లో 67 కిలోల విభాగంలోనూ పసిడి పతకాన్ని గెలుపొందాడు. జాతీయస్థాయి బాక్సర్ లాల్నిత్లువాంగా కుమారుడైన లాల్రినుంగా మొదట బాక్సర్గానే ప్రస్థానం మొదలుపెట్టాడు. కానీ ఆ తర్వాత వెయిట్లిఫ్టింగ్ వైపు మళ్లాడు. కామన్వెల్త్ క్రీడల్లో 165 కిలోల బరువు ఎత్తే ప్రయత్నంలో జెరేమీ గాయపడినట్టు కనిపించాడు. దీంతో ఆ ప్రయత్నా్న్ని విరమించుకున్నాడు. కానీ స్వర్ణ పతకం అందుకోవడానికి పోడియం వద్దకు వచ్చిన సమయంలో అతడు ఇబ్బంది పడుతున్నట్లు కనిపించలేదు. సమోవాకు చెందిన వెటరన్ వెయిట్ లిఫ్టర్ వైపోవా రజతం సాధించగా నైజిరియాకు చెందిన ఎడిడియాంగ్ ఉమోవాఫియా రజతం సాధించాడు.
