స్మార్ట్ ప్రయాణం దిశగా ఏపిఎస్ఆర్టీసీ 

ఏపీఎస్ ఆర్టీసీ కీలక నిర్ణయం తీసుకుంది. ఆర్టీసీ బస్సుల్లో ఇకపై చిల్లర సమస్య లేకుండా సరికొత్త మార్గాన్ని ఎంచుకుంది. బస్సుల్లో త్వరలో ఈ పోస్‌ యంత్రాలను వినియోగంలోకి తీసుకొచ్చేందుకు సిద్ధమైంది. అంటే ఇకపై నేరుగా డెబిట్‌కార్డు, మొబైల్ ద్వారా డిజిటల్‌ లావాదేవీలు పూర్తి చేసి టికెట్‌ ఇస్తారు. ఇప్పటికే ఆర్టీసీ కండక్టర్లకు శిక్షణ కార్యక్రమం కొనసాగుతోంది. ఇకపై చాలా సులభంగా ఈ పాస్ యంత్రాల ద్వారా లావాదేవీలు జరుగుతాయి. ఆర్టీసీ బస్సుల్లో ప్రస్తుతం టికెట్‌ ఇచ్చేందుకు టిమ్స్‌‌ను వినియోగిస్తున్నారు. అతి త్వరలోనే వీటి స్థానంలో ఈ- పోస్‌ యంత్రాలు రానున్నాయి. ప్రయాణికులు మొబైల్‌ నంబర్‌తో లింక్ అయిన అకౌంట్ ద్వారా యూపీఐ పేమెంట్స్‌ రూపంలో డెబిట్, క్రెడిట్ కార్డులు, పేటీఎం, ఫోన్‌పే, గూగుల్‌పే ద్వారా చెల్లించే వెసులుబాటు కల్పించనున్నారు. అంటే ఇకపై బస్సుల్లో చిల్లర సమస్యకు అవకాశమే లేదు. అంతేకాదు ఆర్టీసీ వ్యాలెట్‌ యాప్‌ను డౌన్‌లోడ్‌ చేసుకొని అందులో బ్యాలెన్స్ ఉంచుకుంటే టికెట్‌ తీసుకోవడం ఈజీగా ఉంటుంది. టికెట్‌ బుకింగ్‌, బస్‌పాస్‌, కొరియర్‌, కార్గో సేవలకు సంబంధించి ఈ లావాదేవీలు అందుబాటులోకి రానున్నాయి.

ఈ ఈపోస్ యంత్రాలు ద్వారా చాలా ప్రయోజనాలే ఉన్నాయి. బస్సు వెళుతున్న సమయంలో సర్వీసు మొరాయిస్తే వేరే బస్సులోకి ప్రయాణికులను పంపిస్తుంటారు. ప్రస్తుతం ఎస్‌ఆర్‌లో టికెట్ నంబర్లు రాసేవారు.. ఇప్పుడు బ్రేక్‌డౌన్‌ ఆప్షన్‌ను తీసుకొచ్చారు. కాకపోతే ఈ పాస్‌ యంత్రంకు సిగ్నల్స్ ఉండాలి. ఒకవేళ సిగ్నల్స్ లేకపోయినా ఆఫ్‌లైన్‌లో టికెట్‌ అందజేసే విధానం కూడా తీసుకొచ్చారు. అలాగే బస్సు పోస్‌ను యంత్రంతో స్కాన్‌ చేసిన వెంటనే వివరాలు వస్తాయి. అంతేకాదు ఈ పాస్‌లో కెమెరా ఉంటుంది. ఒకవేళ మార్గమధ్యలో ఏవైనా ప్రమాదాలు ఏవైనా జరిగినా, బస్సు పంక్చర్‌ అయినా వెంటనే ఫొటో తీసి కండక్టర్లే నేరుగా కార్యాలయానికి పంపిస్తారు. ఈ పోస్ మెషిన్లు పైలట్ ప్రాజెక్టుగా ఎంచుకున్న విజయవాడ, గుంటూరు-2 డిపోల నుంచి తిరుపతి, విశాఖపట్నం, హైదరాబాద్, బెంగళూరు, చెన్నై వెళ్లే బస్సుల్లో ప్రవేశపెట్టారు. అన్ని డిపోలు, బస్టాండ్లలో టిక్కెట్లు ఇచ్చే గ్రౌండ్‌ బుకింగ్‌ స్టాఫ్‌కు కూడా ఈ–పోస్‌ యంత్రాలు అందజేయాలని భావిస్తున్నారు. డిజిటిల్ చెల్లింపులతో పాటూ డబ్బులు కూడా చెల్లించే వెసులుబాటు ఉంది. ఇటు మొబైల్ యాప్ ద్వారా కూడా టికెట్ కొనుగోలు చేసుకునే అవకాశం ఉంది. మొత్తానికి ఆర్టీసీ బస్సుల్లో కూడా స్మార్ట్‌గా ప్రయాణించే అవకాశం ఉంటుంది. అలాగే బస్సుల్లో ఎదురవుతున్న ఎన్నో సమస్యలకు చెక్ పెట్టినట్లు అవుతుంది